Coma vimos facendo nos últimos cursos colaboramos na Semana
de Acción Mundial pola Educación . Este ano 2014 será baixo o lema
"Sumemos capacidades. Polo dereito a unha educación inclusiva".
Na sociedade, cada quen é diferente dos demais. A educación ten
que dar a oportunidade a cada neno e nena do mundo de alcanzar un nivel
aceptable de coñecementos baseado nas súas propias características, intereses e
capacidades e os sistemas educativos deben ser deseñados de modo que teñan en
conta toda esa gama de necesidades de aprendizaxe. Deste xeito a educación beneficia a todas as persoas, ensina a todo o alumnado a apreciar a
diversidade, combate a discriminación e promove sociedades máis xustas.
Hai uns días os nenos e nenas de
cuarto de primaria desfrutaron dunha sesión de contos realizada por Bea Campos
dentro do proxecto de sensibilización "Des-Iguais" que busca fomentar entre a
cidadanía actitudes de respecto cara á diversidade cultural.
A través dunha ferramenta como é
o conto que existe en todas ás culturas do mundo preténdese transmitir e
traballar valores interculturais co alumnado.
Os contos foron os seguintes:
Bailar nas Nubes:
Ata os soños máis remotos se
poden facer realidade. Mentres se perseguen aprendemos sobre interculturalidade
e convivencia, rodeados do colorido deste álbum que bebe das fontes do folclore
latinoamericano.
O nacemento do Dragón:
Esta obra bilingüe galego-chinés
mandarín, que conxuga literatura, caligrafía e ilustración, conta a orixe desta
criatura mítica, creada en tempo inmemorial polos nenos e nenas das diversas
tribos chinesas que grazas a súa imaxinación crearon esta criatura para mediar
entre os conflitos dos maiores. Por esta razón o Dragón é un símbolo de paz moi
importante na cultura chinesa.
Os de arriba e os de abaixo:
Hai mundos que conviven,
comparten costumes e se complementan, coa única diferenza de que os
acontecementos transcorren en planos opostos... que se dobran, poden atoparse e
coincidir. Un libro para ler do dereito ou do revés, a gusto do lector; ideal
para compartir a dúas bandas
Os Sacapenas:
Os sombreiros, os zapatos, as
nubes, a chuvia, os paxaros xigantes... Bieito vive amolado polos seus temores,
pero a súa avoa ten unha solución. O segredo está nuns bonecos orixinarios de
terras lonxanas: Os Sacapenas.
A Banda de Vilacendoi:
A música envolvía cada recuncho
da aldea galega de Vilacendoi, pero o despoboamento acabou coa algarabía das
noites de festa. Maxia e nostalxia, emigración e inmigración, futuro e
esperanza, na aldea dos teus soños.
Todos estes contos podedes encontralos na nosa biblioteca.