ENQUISA PARA O NOSO ALUMNADO

 

ROTEIRO CINÉFILO-LITERARIO POLA ALDEA DE CANS

 

ENCONTRO DO NOSO ALUMNADO DE 4º DE E.P 

COA ESCRITORA GALEGA IRIA MISA

 

Nenos e nenas de 4º estiveron lendo libro de Iria Misa,

 

"Excursión a Cans. Unha veciña de película" 

 

e nestos días reuníronse con ela na aldea de Cans 

para realizar un roteiro cinéfilo-literario.

    A actividade permitiulles descubrir os espazos reais nos que trancorre a trama da novela, ambientada durante o famoso Festival de Cans. Ao longo do percorrido visitaron o Torreiro das Estrelas, o Can de Pedra e o Muro dos Chimpíns, escenarios que o alumnado recoñeceu por formar parte da historia lida na aula.

GRazas IRIA!!!

TUI-LE 2026

    O noso centro participou un ano máis na xornada do Tui-Le, ese día especial no que moitos colexios da zona xuntámonos para celebrar a lectura dun xeito diferente.

    A mañá estivo dedicada ao intercambio de libros, os nenos e nenas trouxeron os seus contos da casa para darlles unha segunda vida e leváronse novas historias que descubrir. 

    Tamén desfrutamos do espectáculo "Ollo ao piollo", a cargo da compañía *Barafunda*. O humor, a música e o xogo co público engancharon a maiores e pequenos. 

    Para pechar a xornada, levamos o noso cartel conmemorativo dos *800 anos da Catedral de Tui*. Foi unha maneira de sumármonos a esta celebración tan importante para a nosa cidade e de que o alumnado se sentise parte da historia local.

Xornadas como o Tui-Le recórdannos que a lectura medra cando se comparte.  

                        

                  

VISITA DE MANUEL SOLLA

 

Esta mañá tivemos na biblioteca a *Manuel Solla*, narrador oral, actor, pedagogo teatral e contacontos galego de referencia nos espectáculos familiares e infantís.

As risas dos nenos e nenas de Infantil escoitábanse en cada recuncho mentres seguían as fazañas das marionetas que acompañaban a Manuel. Velos atentos, sorprendidos e participando das historias que narraba, entre toques de maxia e música, foi un verdadeiro agasallo. Grazas a visitas como esta, a biblioteca convértese nun lugar vivo onde as historias cobran vida.

LECTURAS PARA MAIO

 

DÍA DO LIBRO, 23 DE ABRIL DE 2026

Nesta semana, o Colexio Número 2 volveu vivir unha desas xornadas que fan da nosa biblioteca un espazo vivo e compartido. Unha vez máis, unímonos para gozar dunha das actividades máis agardadas por todos:  ler en compañía.

Aproveitando a chegada dos primeiros días primaverais, decidimos sacar os libros fóra da biblioteca e trasladar a maxia da lectura ao aire libre. O noso patio encheuse de historias, imaxinación e, sobre todo, de moita complicidade entre os diferentes niveis educativos.

Como xa vén sendo tradición no noso centro, o alumnado de cursos superiores exerceu de madriñas e padriños de lectura dos máis pequenos e pequenas. Foron os propios maiores os que visitaron a nosa biblioteca para seleccionar con moito coidado os contos que logo lles lerían aos seus afillados e afilladas, buscando historias que puidesen espertar a súa curiosidade e ilusión.

Foi unha experiencia fantástica ver como o colexio se une a través das palabras, creando vínculos entre nenos e nenas de diferentes idades mentres gozaban dun bo libro baixo o sol.

   

Grazas a todas as madriñas e padriños

 por facer da lectura un agasallo!

OBRADOIRO CREATIVO CON KAPLA

A   semana   pasada   desfrutamos   na Biblio  co alumnado de 2º de Educación Primaria   xogando  e aprendendo co material de construcción KAPLA.

Aproveitamos o proxecto no que están traballando "Cociñando o futuro. Viaxando xuntos" para construir, con este material de Polos Creativos, todos aqueles monumentos que foron coñecendo.