Este curso quixemos que o noso festival de Nadal tivese un público moi especial: os anciáns e anciás das dúas residencias e o centro de día da nosa cidade.
Os nenos e nenas dos diferentes cursos desde infantil de tres anos ata sexto de primaria organizáronse en grupos e foron alegrar coas súas cancións, bailes, xogos e sobre todo cos seus sorrisos a vida dos "maiores" e os seus coidadores.
Coma agasaio levaban diversos obxectos, uns feitos con barro e outros decorados coas mans, que quedarán como recordo destes encontros tan emocionantes para todos e todas.
De volta trouxeron ao colexio as historias que os avós e avoas nos contaron da súa infancia, tan distinta e, á vez, tan parecida no esencial, e o cariño co que nos recibiron.
Insistiron en que volvamos, e así ha de ser.
