O cómic galego está de noraboa. Cada vez hai máis autores de
prestixo e os seus traballos alcanzan grandes recoñecementos pola súa calidade.
É o caso de Miguelanxo Prado, que o día 31 de outubro, foi
galardoado polo Ministerio de Cultura co Premio Nacional do Cómic 2013 pola súa
obra "Ardalén", publicada por Norma Editorial no ano 2012, tanto en castelán
coma en galego.
No seu fallo, o xurado destacou o "carácter poético da
súa obra, que mestura a realidade co sono, a memoria e o esquecemento, e a súa
mestría técnica no uso da cor".
Miguelanxo Prado comentou que o nivel dos autores de cómic
"é magnífico" e engadiu que o cómic español se encontra "nun
momento de efervescencia e madureza creativa". "O cómic español está
a vivir a súa Idade de Ouro", declarou minutos despois de coñecer que fora
premiado.
A obra xa gañou este ano tamén o premio á Mellor Obra dun
Autor Español no Salón do Cómic de Barcelona e agora completa o seu éxito co
premio máis importante do medio a nivel oficial.
A Miguelanxo Prado seguro que o coñecedes todos polos seus
debuxos pois é o creador de Xabarín, o coñecido personaxe da Televisión Galega.