A semana
pasada visitounos Isabel de Ocampo que, como sabedes, é directora de cine.
Isabel falounos da súa profesión, contounos en que consiste o seu traballo e
tamén que para facer unha película é necesario que interveñan moitos outros
profesionais: produtores, guionistas, actores, axudantes de dirección,
encargados do decorado, do atrezzo, do vestiario, perruqueiros e maquilladores,
cámaras, encargados da iluminación, do son, da fotografía, etc … unha lista moi
longa que podemos ver no final das
películas.
Deixounos moi
claro que no cine todo é ficción, pero ten que parecer de verdade. O traballo
dos actores ben dirixidos consegue facer
crible a historia. Tamén axudan certos trucos pensados para “enganar” aos
espectadores e facelos crer que o que están vendo está pasando na realidade.
Por exemplo, a maneira de iluminar é moi importante e puidemos comprobar como
un dos nosos compañeiros se convertía nun personaxe moi sinistro só iluminando
a súa cara desde abaixo. Os sons que escoitamos, a música de fondo … fixeron
que sentísemos que algo malo podía pasar. Pero nada era certo. En canto se
acenderon as luces de novo todo volvía a ser normal.
Isabel quixo
rodar connosco algunhas secuencias. Elixiu a unha actriz, a un cámara, a un
encargado de son, a un iluminador, a un
encargado do atrezzo, a un claquetista e comezou a rodaxe.
A encargada
da claqueta dixo: Escena 1, proba 1, plano 1, toma 1. O encargado de son dixo:
Gravando. O cámara dixo: Rodando. O encargado da música dixo: Preparado. A
directora dixo: Acción.
Nese momento
en total silencio e vendo todo o que sucedía a través dunha pantalla deixamos
que a actriz fixese o seu traballo. Ata tres tomas da mesma secuencia tivo que
rodar ata que Isabel aceptase a escena como boa.
Encantounos
participar neste minirodaxe. Foi unha gran sorte poder aprender dunha directora
de cine que xa ten un dos premios máis importantes do cine en España: o Goya.
Conseguiuno no ano 2009 pola curtametraxe de ficción “Miente”. Hai uns días
entregáronse os premios deste ano. Se queredes saber cales son premede AQUÍ.
No enlace poderedes ver coma unha
intérprete en lingua de signos conta para toda a comunidade xorda o que
aconteceu durante toda a gala.
Isabel
rematou a súa estancia no colexio contestando amablemente a tódalas preguntas que
os nenos e nenas lle quixeron facer.
MOITÍSIMAS
GRAZAS!!!
Nesta
presentación recórdanvos cal foi a
primeira película que se fixo na historia, a primeira que tivo son, a primeira
que tivo cor ..., os xéneros que existen, os premios máis importantes, algúns
obxectos e profesións imprescindibles, algunhas pelis que hai que coñecer.