Semana das Letras Galegas 2023. Alumnado de 6ºB

 Están aquí o alumnado de 6ºB a presentarnos unha información moi interesante e divertida sobre o himno de Galicia. 

                            Agardamos que o gocedes.

Semana das Letras Galegas 2023. Alumnado de 5º de Primaria A

 

As alumnas e alumnos de 5º A contaránnos algunhas curiosidades sobre a Bandeira de Galicia.

Moi atentos.

Semana das Letras Galegas 2023. Alumnado de Infantil

 

Actuación de Brais das Hortas

 Hoxe no noso cole...     CONCERTAZO!!

 Nesta semana das Letras Galegas recibimos a Brais das Hortas para disfrutar das suas cancións, das súas ocurrencias e bailar un anaco coa súa música.

Os nosos alumnos reuníronse por quendas nos xardíns do noso cole para escoitar a Brais. 

Semana das Letras Galegas 2023. Alumnado 4º de Primaria

 

Chega a quenda do alumnado de 4º de Primaria.

Agardamos que o gocedes

Semana das Letras Galegas 2023 Alumnado 3º de Primaria

 

Hoxe os nenos e nenas de terceiro de educación primaria contarannos algúns aspectos da vida de Francisco Fernández del Riego.

Fai click no video para escoitar ás nenas e nenos de 3º de educación primaria

Semana das Letras Galegas 2023. Comezamos co 1º ciclo

 Este ano 2023, o día das Letras Galegas está dedicado a Francisco Fernández del Riego.

Dende o CEIP Nº 2 de Tui puxemos a radio escolar de novo en marcha  para homenaxear a este autor e coñecer os orixes do día das Letras Galegas, os símbolos de Galicia...

Iremos publicando diariamente as aportacións de todos e todas os alumnos da escola.

Hoxe comezamos co alumnado de 1º ciclo de Educación Primaria (1º e 2º de Primaria)

LETRAS GALEGAS 2023

 

Día das Letras Galegas

 Este ano no día das Letras Galegas homenaxease a Florencio Delgado, relevante poeta galego.

Se queredes saber máis deixamos uns enlaces moi interesantes para coñecer ao autor e a súa obra.

As letras de florencio

Seminario Galán- Florencio Delgado

ENTRELAZOS DA MEMORIA

A profe Ana, do noso equipo da biblioteca, en colaboración con outras mestras da bisbarra, creou, en Tomiño, unha instalación artístico-pedagóxica titulada "Entrelazos da memoria".

Os nenos e nenas de Infantil do noso colexio participaron nesta actividade coloreando paxaros que formaron parte desta orixinal instalación, inspirada nos “Paxaros faladores” de Xela Arias.

O traballo das mestras xurdiu da súa investigación constante na procura de novas formas de educar. Neste caso utilizaron imaxes da obra da escritora como símbolos para traballar co alumnado outras maneiras de entender fóra da palabra, mostrando unha vez máis as infinitas posibilidades que ten a arte como medio de expresión na escola.

DÍA DAS LETRAS GALEGAS 2021

A escritora Yolanda Castaño, autora do libro "Xela quixo ser ela. Biografía de Xela Arias", fálanos da escritora homenaxeada este ano 2.021 no Día das Letras Galegas, a quen tivo a sorte de coñecer persoalmente.

DÍA DAS LETRAS GALEGAS

Celebramos o “Día das Letras Galegas” con varias actividades ao longo de toda a semana.


Para os/as máis pequenos actuaron Ian Hamilton e Elisa Alfaya cun espectáculo no que sorprenderon con diferentes números de maxia.

E para os maiores, Tino Baz mesturou poemas de Rosalía ou Manuel María… con instrumentos de música tradicional galega (gaita, pandeiro, zanfoña, culleres, cunchas…). 


A unión entre textos tan fermosos, a música da nosa terra e unha gran voz fixeron desfrutar moito ao público asistente.

Ademais, estivo aberta á toda a comunidade educativa unha exposición sobre o “Traxe Galego”.


Nela colaborou connosco a Asociación do Traxe Tradicional de Tui.


Destacaban os traxes de faena e de gala típicos da nosa cidade.

TUI LE: DÉCIMO ANIVERSARIO

O venres 10 de maio tivo lugar por décimo ano consecutivo unha edición do "TUI LE" na que participaron dez centros educativos do concello de Tui.

Houbo coma sempre diferentes actuacións: recitacións e recreacións poéticas (sobre textos de Rosalía ou Antonio García Teijeiro), dramatizacións (a partir do álbum ilustrado “Soños de Algodón” ou do relato “Así foi, doutor“ de Suso de Toro), regueifas (inspiradas en Agustín Fernández Paz), músicas diversas (cancións, versión en rap da obra teatral “Restaurante Farruco” …).

As intervencións abriunas Iria Misa, que falou da súa experiencia como escritora e lectora.

Outras actividades foron o intercambio de libros, un photocall (os grupos de cada centro poideron fotografarse baixo unha pancarta con alusións á X edición deste evento e a algunhas  das efemérides literarias deste ano) e unha exposición de carteis elaborados por escolares de cada un dos centros con creacións sobre distintos autores contemporáneos (Fraguas, García Teijeiro, Ledicia Costas, María Luisa Núñez, Anxo Fariña, Fina Casalderrey, Chus Pereiro, Agustín Fernández Paz e Iria Misa) e unha recreación do décimo aniversario do Tui Le, feita no noso colexio.

Ao longo da xornada máis de 500 alumnos/as e profesores/as fixeron visible que Tui ama a lectura e os libros porque, como dixo Antonio Fraguas: “Os libros son compañeiros infatigables, amigos sempre,  os máis nobres, os que distraen, os que che fan pensar, que é unha das cousas que hai que facer”. 

DÍA DAS LETRAS GALEGAS

Con motivo do Día das Letras Galegas, as nenas e nenos do colexio asistiron a diversos espectáculos. 

Os máis pequenos recibiron a visita de “As Maimiñas”. 

O alumnado de terceiro e cuarto presenciaron a actuación do mago Javier Muro. 

E as nenas e nenos de quinto e sexto aprenderon a facer regueifas.

IX EDICIÓN DE "TUI LE"

A Biblioteca do CEIP Nº2 de Tui organizou, unha vez máis, xunto coas bibliotecas do resto de centros educativos de Tui e a Biblioteca Pública Municipal, a edición IX de TUI LE 2018, co gallo da celebración do Día das Letras Galegas, dedicado á escritora María Victoria Moreno. Para iso as nenas e nenos do Nº2 construíron unha pancarta sobre a autora.

Hoxe no TUI LE, que tivo lugar na Praza de San Fernando de Tui, puideron recitar poesía e compartir unhas pezas musicais con todos os participantes dos demais colexios e institutos. Os encargados e encargadas de representar ao CEIP Nº2 de Tui foron as nenas e nenos de Educación Infantil e de 6º de Educación Primaria.

 

VISITA DE CELSO FERNÁNDEZ SANMARTÍN

Recibimos a visita de Celso Fenández Sanmartín, que é un excelente contacontos, coñecido tanto dentro coma fóra das fronteiras da Galicia.

O seu repertorio está composto basicamente por historias ligadas á tradición oral galega e asentadas na cultura popular rural, pero cun toque contemporáneo, para demostrar que tamén son actuais.

O encontro foi co alumnado de 3º, 4º, 5º e 6º e resultou moi ameno e divertido e unha vez máis demostrou a forza dos contos e da tradición oral como fonte de entretemento e de aprendizaxe. 

Todos e todas estiveron atentísimos/as a esas historias dos tempos das reunións ao calor do lume da lareira, tempos en que non había aparellos electrónicos, pero nos que estaba moi presente a retranca galega que sempre fai sorrir. 

A forma de contar de Celso encandilou aos nenos e nenas que escoitaron entusiasmados/as e mesmo cantaron e xesticularon con el durante unha hora enteira.

AS LARANXAS MÁIS LARANXAS....

Os nenos e nenas de 6ºB representaron para todo o colexio a obra de teatro "As laranxas máis laranxas de tódalas laranxas", que foi o segundo libro infantil de Carlos Casares.

É unha peza teatral que se fixo moi popular despois de que o autor gañase o Concurso de Textos Teatrais O Facho 1973, o que o situou como un dos precursores do teatro infantil en galego.

A acción  se desenvolve nunha horta diante dunha casiña de planta baixa onde se van xuntando personaxes moi curiosos: Elías, Anxa, o can Paulino, a galiña Petra, unha laranxa, un ovo, o Veciño da Escopeta, o Veciño Gordo, a Veciña Desdentada, a Veciña Sabida e o Veciño Torto.

Todo comeza cando cinco estrañas e enormes laranxas aparecen nun limoeiro. Unha estoupa, o que fai que os veciños do lugar acudan á horta e alí empezan a pasar situacións disparatadas e o disparate vaise incrementando a medida que a trama avanza.

Todo o público desfrutou moito da representación.
Noraboa aos artistas!

OS MAIOS

Todo o colexio colaborou na construción de tres "maios" que foron expostos o "Día das Letras Galegas" no Paseo da Corredoira.

Os nenos e nenas trouxeron os materiais que necesitaban (fiuncho, pampullos, laranxas, flores variadas...). Logo, por grupos, foron clasificándoas e facendo colares moi longos.

Ao mesmo tempo, outros grupos encargáronse de ir engarzando o fiuncho ata cubrir totalmente as armazóns de madeira e arame.

 Finalmente, colocáronse os colares e outros adornos, e así de bonitos quedaron.

VIII EDICIÓN DE TUI LE

Un curso máis, esta vez no Teatro Municipal da Área Panorámica, tivo lugar unha nova edición do "Tui Le", na que participamos xunto aos outros centros educativos do concello de Tui.

Houbo cancións, bailes, Kamishibai, dramatizacións, recitación de poesías, proxección de vídeos...

O noso centro participou coa representación por parte do alumnado de sexto da obra de Carlos Casares “As laranxas máis laranxas de tódalas laranxas “.

Tamén organizouse un photocall onde os grupos de cada centro podían fotografarse  debaixo unha pancarta con alusións á VIII edición deste evento e a dúas efemérides literarias: o centenario do nacemento de Gloria Fuertes e a dedicación do Día das Letras a Carlos Casares.

Ademais fíxose unha exposición de carteis elaborados en cada centro sobre a figura de Carlos Casares.

Outra das actividades foi o intercambio de libros entre o alumnado os distintos centros educativos.

PRIMAVERA DAS LETRAS

A Primavera das Letras é un proxecto web da Real Academia Galega que ofrece recursos didácticos que permiten traballar os contidos educativos relacionados co Día das Letras Galegas desde unha perspectiva interdisciplinar.